تبلیغات اینترنتیclose
مزکی النفوس رساله‌سی - 3 (قارا مجموعه کیتابی)
شیخ صفی الدین اردبیلی در پژوهشهای دکترحسین محمدزاده صدیق
شرح احوال، افکار و آثار شیخ صفی الدین اردبیلی بر اساس تحقیقات استاد دکتر حسین محمدزاده صدیق
موضوع : مزکی النفوس رساله‌سی, | بازدید : 543

6- 7. عُزلتين فايدالاري

بيلگيل ايندي، اي عزيز  قارداش! كيشي بو خلقدن عزلت ائديب كسيلمه‌يينجه، ديليني، دينيني، قارنيني، گؤزونو و بو يئددي اعضاسيني ساخلاياماز. زيرا بو جميع اعضالاري شرّه ايلتمگه[1] سبب بو خلق‌دير. هاچان بير كيشي بو خلقه قاريشسا، البته بو خلقه اويماق[2] لازم گلر. اگر اويماييب، مخاليفت ائدرسن، سنه دوشمان اولورلار. سنه راحت گؤسترمزلر. سني اينجيدرلر. ائله اولسا، بونلاردان عُزلت گركدير.

و هم، نئچه دورلو آفتلر بو خلقه قاريشماقدان گلر. بعضي عارفلر دئميشلر دير كيم بو خلقه مصاحيب اولماق، همان اود ايله مصاحيب اولماق گيبي‌دير. پس، بو اوددان كيشي منفعت‌لنمك گركدير.

اما كه، حذر ائتمك گركدير كيم بو اود، كندويي يانديرمايا.

قارداش! غيبت اختلاط‌دير، ريا اختلاط دير. يعني خلقه قاريشماقدير. يالانچيليق اختلاط دير. تكبّر، حسد، نفاق اختلاط دير. داهي نه دنلي ياراماز فعل وار ايسه، هپ اختلاط‌دا‌دير.

پس، عزلت سلامتليق دير. كيشي خلوتده اوتورسا، نئجه مولا ايله معامله‌يه يول بولماز. خصوصاً كيم بو شيمديكي زاماندا، بو شيمديكي زامانين قووموندان عزلت ائتمك البته گركدير.

شول حديث ايله كيم رسول حضرتلري – عليه السلام- بويورموشدور:«. . . آخر بير زامان گله كيم، ضعيف اوزره اولا اسلام، ايمان. واعظ‌لر چوخ اولا، دونيا ايچون وعظ ائده‌لر، بولدوقلارين سؤيليه‌لر، تانريا و رسولونا بهتان ائده‌لر. يعني تانريا و رسولونا بهتان ائديب، اسناد ائديب سؤزلر سؤيليه‌لر. اول زامانين عاليملري آز اولا، اول ظاليملري دفع ائتميه. كندي [لري] منبره چيخيب ائتديكلري ايچون اونلار داهي دينميه‌لر. ديلنچيلري[3] چوخ  اولا،‌ وئريجيلري آز اولا. ائله اولسا، اول زامان كيم ايريشسه، زنهار اونلارا قاريشمينيز، اونلاردان عزلت ائدينيز.»

اي عزيز! تحقيق شونو بيليريز كيم اول بيزيم سيّديميز و پيغمبريميز، آخر زامان پيغمبري محمد مصطفا كيم محبوب حضرتدير و شفيع امت‌دير، بيزه آتاميزدان و آناميزدان شفقتلي‌دير. ائله اولوجاق، بيزه گلي گليسن، يئنه بيزدن اول يئي‌بيلير. چون اول بيزه بويوردو، بيز داهي اونون سؤزونه اويماق گرك. خلقدن كسيلمك گركدير.

دؤندولر، رسول حضرتلرينه سوردولار، آييتديلار كيم:«اول نه واخت اولور يا رسول الله؟»

اول سلطان الانبياء آيدير:«اول واخت اولور كه علمه ييلتينالار[4] نفس هواسي ايچون، يعني دونيا اولولوغو ايچون، عزّت ايچون و منصب ايچون، يا قاضي اولوب قضايا اوغراماق ايچون و يا خود مدرّس اولوب تنعّم ائتمك ايچون، صدره كئچمك ايچون. و داهي اوخويالار، علمي، نفسلرينه ايلته‌لر. علمي، الله قاپي‌سينا وارماغا سبب ائتميه‌لر. بلكه دونيا بيگلري قاپي‌سينا وارماغا سبب ائده‌لر. اول زامانين بيگلري، داهي، اهل علمي خور گؤره‌لر. اول زامانين عاليملري‌نين غايت ديني واردير. دينلريني دونيايا ساتالار، فقرايا شفقتلري اولمايا. مسجيدلر يولو و مسجيد‌لر خلوت اولار و ميخانه‌لر يولو و ميخانه‌لر غلبه[5] اولا.» دئيه بويوردو.

رسول [عليه السلام] اول پر اصول پس اول زاماني و اول زامانين قوومونو بيان ائيله‌دي. و بو شيمديكي زامان، همان اول زاماندير. و قوومو داهي، اول قوومدور. بيز گؤزوموز ايله گؤره‌ روز كيم بو قوومون گوندن گونه شرلري آرتادورور[6] و خيرلري اكسيلي دورور.[7]

چون، حال بؤيله‌دير، سن اونلارا نه ايچون قاريشاسان؟ و يولوندان شاشاسان؟ واراسان، اودا دوشه‌سن؟

ائشيتدين اولا كيم مشايخدن نئچه‌لري اتفاق ائتديلر، بو خلق آراسيندان چيخديلار، وارديلار كيمي داغلار باشيندا كي ماغارالاردا اوتوردولار، عيبادته طاعته مشغول اولدولار. كندولر[ينه] مريد [و] محبّ اولانلارا داهي، وصيت ائله‌ديلر كيم خلقدن قاچالار، شول ارسلاندان قاچاريم گيبي. و اول مشايخلردن بيريسي سليمان داراني دير كيم - رحمت الله عليه- مريدلرينه وصيت ائديب آييتدي كه:

«- قاچين خلقدن، داهي شول ارسلاندان قاچار[8] گيبي.»

يعني نئجه كيم ارسلاندان قاچارسيز، خلقدن داهي قاچين.

داهي آييتدي كيم:

«- قاريشين بو خلقه بير قاچ يئرده: بير جمعه‌ نمازيندا، نماز قيلينجا. و بير [ده] بايرام‌[لار] نمازيندا، نماز قيلينجا.» آنجاق شو أوچ يئردن غيري واختدا، بو خلقين آراسينا گيرمگه دستور يوخدور. طاليبلره جميع مشايخلرين اتفاقي بونون اوزه‌رينه‌دير. اگر قاريشيرسا، خالق‌دن محروم قالير، مرايي اولور. مرايي، خود مُشرك‌دير. زيرا رسول حضرتي - عليه السلام- ائله بويوردور:

«- پس ائله اولسا، خلقدن قاچماق گرك.»

شيخ سفيان ثوري - رحمت الله عليه- [آيدير]:

«- والله شيمديكي زاماندا عزلت ائتمك حلالدير. بو خلقه قاريشماق حرامدير. زيرا بو شيمديكي قووم ضلالتي آرتيرديلار. ايچلرينده حرام نسنه، شول بير حلال گيبي استعمال اولور اولدور.»

امام [محمد] غزالي آيدير - رضي الله عنه- :

«- بو شيمديكي زاماندا عُزلت ائتمه‌مك مرضدير.» دئير، «و اعتزلكم و ما تعبدون» آيتيني حجّت گتيردي.

امام بو سؤزو دئيه‌لي بئش يوز ايلدن زياده‌دير.[9] بو، شيمديكي بيزيم زامانيميزدا خود، داهي فرضدير. بيلگيل ايندي، اي قارداش! بو خلقدن سنه هئچ فايدا يوخدور. بو خلقه قاريشيجيق مخاليفتي اورتادان گؤتورمك گرك‌سن، بونلارين خود ايشلري، قوول‌لاري، فعللري گؤرونور دورور. اگر بونلارا موافيقت ائدرسن، آللاها عاصي اولورسان و رسولونا اويماميش اولورسان. اگر مخاليفت ائده‌رسن، سنه نكته ائده‌رلر. و سني اينجيده‌رلردي. سنين اول دنلي كمالين يوخدور كيم بونلارين زحمتينه تحمّل ائده بيله‌سن. آزميا‌سن، يوخسا بو گئن دونيايي سنه دار ائده‌رلر، صفان گئده‌رلر. كؤكلو، كؤكسوز كندولري [ني] سنه دوشمان ائده‌رلر.

سن، داهي، ناگاه صبر ائده‌مه‌ييب، بو خلقه نفسين ايچون قاقياسان. بد دعا ائده سين. سنه رزق وئرن و سني يوخودان وار ائدن سلطانين قاپي‌سينا واراسان. هپ قاپيلاردان آوارا اولاسان و بو خلقدن كسيله‌سن. اخلاص ايله اونون قاپي‌سيني اختيار ائده‌سن. مادامي كه اونون قاپي‌سيندا مجاور اولاسان، هر گونلرين بايرام و هر گئجه‌لرين قدر اولا، ايكي جهاندا سلامت اولاسان.

 

7- 7. شيخ ايله مريد

بيلگيل ايندي، مشايخين ادبلريندن بيريسي داهي بودور كيم شيخ ايله مريد بير سفره‌يه سونمايا و بير قاليچه‌يه اوتورمايا، و شيخين اوتوردوغو يئره داهي اوتورمايا، و شيخ ايله بير بارداقدان سو ايچميه، و شيخي، دونيادان نقل ائده‌رسه، و يا بوشارسا، عورتيني آلمايا، كيم آدابِ طريقتده يوخدور.

شيخين كسوتيني، يعني خيرقه‌سيني دستورسوز گئيميه و شيخي زيارت ائتمك ايستيجك، يعني شيخين الين – آياغين اؤپمك ايستيجك، آبدست‌سيز ائتميه كيم بير قاچ نسنه‌يه آبدست‌سيز ياپيشماق بي‌ادب‌ليك‌دير.

بير مصحفه، و بير پيغمبره و قبرلرينه داهي زيارت ائتمك همان كنديلري حياتيندا زيارت ائتمك گيبي‌دير. و بير داهي كعبه‌يه، و بير داهي اوليالارا آبدست‌سيز واريب ياپيشماق ادب دگيلدير.

و بو اوليالارين كؤنلو داهي كعبه‌دير و ظاهير كعبه‌يه، «كعبه‌ي خليلي» دئرلر، و بو كؤنول كعبه‌سينه، «كعبه‌ي جليلي» دئرلر. و اول ظاهير كعبه[ني]، داش ايله توپراق ايله خليل پيغمبر ياپدي - عليه السلام-. و بو كؤنول كعبه‌سي كي اوليانين كؤنلودور، اونو جليل جبّار ياپدي.

و اول ظاهير كعبه[ني] زيارت ائده‌نين تني اوددان قورتولار، و بو باطين كعبه[ني] زيارت ائده‌نين هم تني و هم جاني اوددان قورتولار.

و وصال دوست، داهي، كؤنول كعبه‌سينده‌دير. نئجه كيم مولانا جلال الدين حضرتي بويورموشدور:

اي قوم به حج رفته كجاييد؟

معشوق همين جاست، بياييد، بياييد.

 

 و شيخ صفي [الدين اردبيلي] – قدّس الله سرّه- بو بيتين معناسيندا بويورور كيم:

«- بيت الله ايكي دير. يعني كعبه ايكي دير يئر أوزونده. بيري بيت الله دير كيم خلاييق، اونو كنديلر[ينه] فرض اولدوقجا طواف ائده‌رلر و بير داهي كؤنول كعبه‌سي دير كيم بئيتده كئچن خيطاب، اوّلكي كعبه‌نين طاليبلرينه‌دير. يعني دمين اولور كيم اگر چه اداي ركن اسلام، اول ظاهير كعبه ايله حاصيل اولور، اما معرفت الله كؤنول كعبه‌سينده حاصيل اولور.»

پس شؤيله اولور بو بئيتين معناسي كيم:

«- اي معرفت طلب ائدنلر و حق ايسته‌ينلر! كؤنول كعبه‌سينه گلين و اونو بو كعبه‌ده طلب ائدين. و حق طلب ائدنلر ائتمك قطع مسافت صورت ايله اولماز كه «وَإِذَا سَأَلَكَ عِبَادِي عَنِّي فَإِنِّي قَرِيبٌ»[10] «وَنَحْنُ أَقْرَبُ إِلَيْهِ مِنْ حَبْلِ الْوَرِيدِ»[11] دئير.

پس شيخ [صفي الدين اردبيلي] بويوردو كه:

«مرد ارنلر اوتوراركن، حق طلبين سفرين ائده‌رلر، بولارلار. و نامردلر حق طلب ائديب، يازيلاردا[12] سرگردان گزرلر، بولمازلار . . . چونكي حق تعالي قولا قولدان ياخيندير. يازيلاردا سرگشته گزمكله، وصال حاصيل اولماز. پس، سنين حجابين اؤرتن، همان سنسن. كند[ي] حجابيني اورتادان گؤتور، داهي وصال اله گتير . . . »

پس، اولياء اللهي آبدست‌سيز زيارت ائتمك بي‌ادب‌ليكدير. پس، بو سؤزلردن موراد، قلوب اوليادير كه اول، قلب حقيقي‌دير.

و هاچان، شيخ ايله يئريمك، يولا گئتمك واقع اولسا، شيخين يانينجا گئتمك ادب دگيلدير. شيخين آردينجا ياپ- ياپ گئتمك ياخشي‌دير. اگر شيخ آيدريساكيم:«گل اؤنومجه يئري!» يئريمك گركدير.  اوندا حكمت واردير، اونو اهلينه دئرلر.

و بير ادبي داهي مُريدليگين بودور كه شيخه غايت حؤرمت ائده و شيخه حؤرمت ائتديگي گيبي، اوغلونا، قيزينا، قولونا، خلاييقينه، حتي آتينا، قوشونا، جميع حيوانجيقلارينا بئله حؤرمت ائده‌ كيم حؤرمت‌سيزليك، داهي، ادب‌سيزليكدير، محروملوغا سببدير. زيرا، حق تعالي عظمت ايله بو صالحلره حؤرمت ائدر، اونلارا حؤرمت ائتديكدن، اونلارين حئيوانجيقلارينا داهي بئله حؤرمت ائدر. گورمزميسن اصحاب كهف[13]ين ايتيني وي صالح پيغمبر[14] دوه‌سيني و ابراهيم پيغمبرين بوز آغي‌سيني و اسماعيل پيغمبرين قوچونو و موسي پيغمبرين صغيريني و يونس پيغمبرين باليغيني و عُزيرين ائششگيني و سليمان‌ـين قارينجاسيني و بيلقيس‌ـين هدهدونو و محمد مصطفي‌نين - صلوات الله و سلّم- دوه‌سيني؟

«مقاتل» روايتينده بؤيله‌دير. بو حئيوانجيقلار، صالحلره خيدمت ائديب، بئله يولداشليق ائتديكلري ايچون، حق تعالي، بونلاري جنته قويار و بونلارا حؤرمت- عزّت ائديب، و قالان حئيوانلار ايچيندن بونلاري أوروندولر،[15] حؤرمتيني بيلميه‌سن، و اونلارين توابعينه عزّت ائتميه‌سن. علي الخصوص، مُريدليك دعويسين داهي ائده‌سن! اي بي‌عار آدمي! هئچ غئيرتين يوخمو كيم ايت جنّته گيره، صالحلره سئومه‌ييب و صالحلره اعتقادين – حؤرمتين اولماديغي ايچون؟

اما، سنين صُلحايي سئومه‌ديگينه بير سبب واردير. سبب اولدور كيم «نفس اماره» كافير صيفتدير، صلحايي سئومز. پس سن داهي، نفسِ امّاره‌يه تابع اولوب دورورسان، صالحلره خيدمت ائيله‌دين و نه كؤنوللرينه گيردين كيم بونلارين دَرونلاريندان سنين داهي كؤنلونه بير يوموشاقليق حاصيل اولايدي.

پس، گئرچك مريدلر، شيخدن نصيب و همّت ايستيه، دوغرو طاليبلر داهي گركدير كيم شيخه و شيخين جماعتينه و خيدمتكارلارينا و حئيوانجيقلارينا محبت ائديب، حؤرمت ائيليه. تا كيم اول داهي حؤرمت و همّت بولا.

اما آداب طريقت بودور كيم مريد، شيخدن حؤرمت اوممايا و «شيخ، مريده حؤرمت ائتمك» يوخدور. وقتها، بير كرت خاطيرجيغين تسلّي ائديب رعايت ائدرسه، دوروستدور. و مريد اولوب، طاليب اولوب، مشايخ ائشيگينده اولان كيشيلر، شيخ يئمگيندن يئمك و دوكان يئمگين و اؤلو ايچون پيشن يئمگي يئمك، و وقف ائتمگين يئمك و عوانلار[16] ائتمگين يئمك، مريده جميع بونلاري يئمك، غايت ادب‌سيزليك دير و كؤنولو داهي، قاراردار.

و مريد[ين] بونون گيبي لوقمه‌لري يئمگي، كندي كندينه تقصيرليك ائديب، حؤرمتيني كندي‌نين اليله اودا اورماق گيبي‌دير. و مريد اولان كيشي [دن] ادب‌سيزليك ائتمك اولماز. پس، ادب بودور كيم، هر گاه كيم بير ايش ايشلر، شيخ مشورتيله ايشليه. و هر نه كيم ائدر، شيخينه دانيشمايينجا، ايشلميه.

يا سفره گئتمه‌لي اولسا، و يا نسنه ساتمالي و يا نسنه آلمالي اولسا، و يا اوغول ائوه‌رملي[17] اولسا، و يا قيز چيخارمالي اولسا، شيخينه دانيشماق گركدير. دانيشمادان، واريب مريد باشلي باشينا بير ايش ايشلمك گستاخ‌ليق، ادب‌سيزليك‌دير. و ايشي راست داهي گلمز و هم طريقته مخاليفدير.

نئجه كه اصحاب، رسول زامانيندا - صلي الله عليه و سلّم- هر ايشلريني رسول حضرتينه دانيشمايينجا ايشلمزلردي. حتي، «بو گئجه ائوه واراليم‌مي؟» دئرلردي، و «خاتونلاريميزا ياخين اولاليم‌مي» دئرلردي.

پس، طريقتده، مريد هر ايشي شيخه دانيشماق گرك و شيخين سؤزونو توتماق گرك. و مريد، بير ايشينده متحيّر اولسا، واريب شيخينه «شو[نو] من نئجه ائده‌ييم؟ شو ايشيمده عاجز قالديم.» دئمك گركدير. شيخ نئجه مصلحت گؤره‌سه، و نئجه بويورارسا، ائله ائتمك گركدير. و اگر دانيشمازسا، قاتي يارامازليق ائدر.



[1] ايلتمك: آپارماق، يئرينه يئتيرمك، يئتشديرمك.

[2] اويماق: انطباق ائتمك، مناسب اولماق، چاتماق.

[3] متن، دلنجو (dilinçi): سائل، يولچو.

[4] ييلتينماق: ياخينلاشماق.

[5] غلبه: ازدحام، شولوق.

[6] آرتادورماق: آرتماق، چوخالماق.

[7] اكسيلي دورماق: اكسيلمك، آزالماق.

[8] قاچار (qaçar): قاچماق مصدريندن فاعيلي صيفتدير.

[9] بئله‌ليكله كيتابين يازيلما و يا استنساخ تاريخي هيجري اونونجو عصرين آخيرلاري اولماليدير. امام محمد غزالي هيجري 450 ايلينده دونيا گلميش و 505 ايلينده اؤلموشدور.

[10] بقره/ 186.

[11] قاف/ 16.

[12] يازي: چؤل، صحرا.

[13] اصحاب كهف: دقيانوس آدلي ظاليم حاكيمين اليندن قاچان، 309 ايل بير كؤهولده ياتان يئددي نفر (كهف/ 25). توركجه‌ميزده اونلارا «يئددي‌ارلر»ده ديئيلير.

[14] صالح: ثمود قبيله‌سيندن و سام بن نوح اعقابيندان. قبيله اهلي اونا اينانماق ايچون دليل ايسته‌ميشدير و او ايسه داغدان دوه چيخارتميشدير. بو دوه‌ني «عاقرة الناقه» آدلي بير اوشاق اؤلدورموشدور.

[15] أوروندوله‌مك (üründülemek): سئچمك، ياخشي سئچمك، ممتاز ائتمك.

[16] عوان: پيس، فاسيد و فاسيق كيمسه.

[17] ائوه‌رملي(evermeli): ائولنديرملي.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : شیخ صفی الدین اردبیلی به روایت دکتر صدیق,شناختنامه شیخ صفی الدین در پژوهشهای دکتر حسین محمدزاده صدیق, قارا مجموعه و تدوین دکتر حسین محمدزاده صدیق, شیخ صفی الدین اردبیلی از دیدگاه حسین محمدزاده صدیق,شیخ صفی الدینین مزکی النفوس رساله‌سی,شیخ صفی الدین در تحقیقات حسین محمدزاده صدیق,دکتر حسین محمدزاده صدیق و قارا مجموعه کیتابی,قارا مجموعه اثر شیخ صفی الدین,شیخ صفی الدین از دیدگاه دکتر حسین محمدزاده صدیق,
ارسال در تاريخ شنبه 8 مهر 1391 توسط دکتر صدیق. ارسال: سید احسان شکرخدایی