تبلیغات اینترنتیclose
یول اهلینه قیلاووز - شیخ صفی الدین اردبیلی
شیخ صفی الدین اردبیلی در پژوهشهای دکترحسین محمدزاده صدیق
شرح احوال، افکار و آثار شیخ صفی الدین اردبیلی بر اساس تحقیقات استاد دکتر حسین محمدزاده صدیق
موضوع : یول اهلینه قیلاووز رساله‌سی, | بازدید : 514

بو اثرين‌ده ترتيب ائدني معلوم دگيلدير. اثر، البويوروق رساله‌سي كيمي سلطان شيخ صفي الدين اردبيلي‌نين ديليندن يازيلميشدير. چوخ گومان كه يول اهلينه قيلاووز رساله‌سيني، بلكه شيخ صفي اؤزو يازميشدير. اثري يوخاريدا وصف ائتديگيميز البويوروق كيتابي‌نين ضميمه‌سيندن آلديق.

1- 6. خليفه نين تعريفي

پس ايندي يول اهلي نين حالي بودور كه بيلديسن و ائشيتديسن. بير كيشي بو طريق ايچينده اولماسا، يول اهلي دئمك اولماز. سؤيله معلوم اولماسا دينله:[طريقت] قاپي سي اولدو گوشاد. كيم مورادي اولان ايرسين مورادا. اگر بو سؤزده ن عيبرت آلدينسا، تمام اولدو نصيحت بورادا.

بوندان سونرا خليفه نين شرطيني و خاصيتيني و معناسيني بيلديرير. شيخ صفي الدين حضرتلرينين بويوردوغودور: «ايندي معلوم اولسون كيم بو جهاندا اول خليفه آدم صفي الله - عليه السلام-  دير. اونون حققينده جناب حق حضرتلري بويورموشدور:«وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً».[1] جناب حق حضرتلري ملائكه لره بيلديردي كيم آدم صفي الله يئر اوزونون خليفه سيدير.

بؤيله اولونجا اول خليفه آدم دير. ايكينجي خليفه خاتم دير. داهي آدم دن خاتمه گلينمه يه قده ر، يئددي مين ايل كئچدي. يوز ايگيرمي دؤرد مين پيغمبرلر و اوچ يوز اون اوچ مرسل لر گلديلر. آرالاريندان بير نئچه سي خليفه ليك ائتديلر. اول جمله دن: داوود[2] خليفة الله، سليمان[3] نبي الله، خضر،[4] يوسف[5] و هم اسكندر[6] ذوالقرنين كيمي كيمسه لر خليفه ليك ائديب مغربدن مشرقه دونيايا گلديلر و هم گئتديلر. تا كيم آخرالزمان پيغمبر خاتم الانبياء محمد المصطفي صلي‌الله وآله و سلم دونيايا گلدي. هپسيني مسخر ائيله دي.

جناب حق حضرتلري اونا  «حبيبيم و رسولوم» دئدي. ايگيرمي اوچ ايل عالمي دين اسلاما دعوت ائيله دي. اوتوز اوچ صحابه جمع ائيله دي. عاقيبت اولدوغو دونيادان گئتدي. حضرت حقه واصيل اولدو. اونون يئرينه هر كيم قائم مقام اولسا، خليفه دير».

2- 6. بئش حرف

رسولون قائم مقامي و هم وصي سي، حضرت علي بن ابوطالبدير و اون بير ائولادي ]هم[ چنان خليفه دير. اونلارين نسلي داهي، خليفه ديرلر. هر كيمي نصب ائديب يئرلرينه گؤندرسه لر، اول داهي خليفه دير.

و اسم خليفه بئش حرفدير: خ، ل، ي، ف، هـ . بو بئش حرف «آل عبا» دان عبارتدير. يعني دست ولايت، سرِ ساقيِ كوثردير.

بير معنا داهي، خليفه اوغولا دئييلير. خليفه، صالحدن عبارتدير. ئويله اولسا، «خ»، خليفه دير، يعني اوغولدور. «ل»، لطف و كرمدير. «ي» يئر كيمي ساكيت اولماغا اشاره دير. «ف»، فارغ البال اولماقدير. «هـ»، اسم هودور، گلبانگ اوليادير، خليفه لره مخصوصدور.

«الله» اسمي بئش حرفدير. «محمد» اسمي بئش حرفدير. «خليفه» اسمي داهي بئش حرفدير.

 

3- 6. يئددي اوز

طاليب، معنايي اييجه[7] فهم ائيليه. «خليفه» دئمگين يئددي اوزو واردير و هر اوزون بير توجهو واردير و اون ايكي شرط واردير و هر شرطين بير خاصيتي واردير. خليفه مقاميندا اولان كيشي گركدير كه بو شرطلري و اون ايكي خاصيتلري بيله. اول زامان، اونا «خليفه» دئمك لاييق اولار. اگر بو يئددي يوزو و اون ايكي خاصيتي بيلمه سه، اونا خليفه دئمك بهتاندير. و بير كيمسه كندويه بهتان ائيله سه، عقلين كمالي نقصان اولا.

و اول يئددي اوز بونلاردير: وحدت، خيدمت، ارادت، امامت، سلامت، ملامت، دؤولت. هر كيم بونلاري يئرينه گتيرسه، جمله سين تمام يئرينه گتيرميش اولار.

 

4- 6. يئددي اوزون شرحي

بونلارين توجهو ايسه، پس ايندي ]بئله دير[:

وحدت، اولدوركيم ايكي ليك دن كئچيب، بيرليگه ايريشه. اونون اثري واحديندير.

خيدمت‌اولدوركيم‌يول اهلي‌اولان‌قارداشلارين‌جمله‌سينه‌بيرگؤزله‌باخماق دير. يعني‌بؤيوك‌وكوچوگوبيربيلمكدير.هپسينه‌بيردن‌خيدمت‌ائله‌مك دير. اونون اثري تكبرلوگو ترك ائديب كؤنولده تواضع و مسكنت اولماقدير.

«ارادت» اولدوركيم بو يولا صيدق ايله گليب، مرشد كاميله ارادت گتيرمكدير. اونون اثري عشقدير. معشوقه جمالين مشاهده قيلماقدير.

«امامت» اولدوركيم اماملار يولونا، دين عشقينه دوشه، اونون اثري، اولدوركيم غير ايله همدم اولماماقدير.

«سلامت» اولدوركيم كندي ايمانين و دينين سلامت توتماقدير. اونون اثري، خاصلاردان غيري ايله صحبت ائتمه مكدير.

«ملامت» اولدوركيم روسواي عالم اولوب، عار و ناموسو ترك ائتمكدير. يعني خرابات گوشه سينده خراب اولماقدير. اونون اثري، محبت مجليسينده، علم تعليم ائتمكدير. يعني گؤيلردن خبر وئرمكدير.

«دؤولت» اولدوركيم ترك تعلقات ائديب، جمله وارليغين يوخلوغا ساتماقدير. نه قده ر كيم وار ايسه، دين قارداشلاري ايله يئييب ايچيب، خوش گؤرمكدير. اونون اثري دم ديدار گؤرمكدير و اونلاردان موراد آلماقدير و دوستون جمالي مشاهيده سينه ايرمكدير و موراد ايسته ينلره موراد وئرمكدير. 

 

5- 6. ختايي‌نين شعري

نفَسِ اهلِ دلين گؤوهري،كاندير بيله  نه

نوطقوموز قدرتِ حق، روح ]و[ رواندير بيله  نه

معرفت گؤوهري نين كانينا معدن اولا گؤر 

ايشته بو علم ]و[ هنر، گنجِ نهاندير بيله نه

قوولو يالانچي مصاحيبلري آت، گل چك الين،

همدم اولماق دئو ايله، كول زياندير بيله نه

ايسته دي، بولدو خضير آب حيات[8] چشمه سيني،

اي كيم اول معشوقه نين يوردو آماندير بيله نه

شربتِ حقدن ايچن عشق اري، آزاده اولار 

شؤيله سرمست اولانين كوفرو ايماندير بيله نه

اي ختائي ! حقي سن تاني اؤزوندن فارغ اول

داهي سؤز سؤيلمه گيل،سؤزده هماندير بيله نه

 

6- 6. اون ايكي شرط

شيخ صفي الدين حضرتلري بويوردو: «چون بو يئددي اوز تمام اولدو، اون ايكي شرط بيان و عيان ائده ليم:

سخاوت، سعادت، غيرت، عبرت، حؤرمت، صحبت، مروت، شفقت، اقرار، ايثار، تولا، تبرا.

ايندي «سخاوت»، اولدوركيم، يئيه سن، يئديره سن، آديني صاحيب جومرد دئديره سن. اما، عارفلر بوندا بير معنا بويورموشلار: «يئين بازاردير، يئمه ييب يئديرن بي آزاردير». دئميشلر.

بونون اثري يئييب يئديرمك، حق ايچون اولما ]قدير[ كيمسه‌يه منت ائتميه سن.

«سعادت» اولدوركيم قادر اولدوغون قادار الدن گلني منع ائتميه سن اونون اثري موراد ياخشي اولماقدير. كؤنول ائوين ياپيب معمور قيلماقدير.

«غيرت»، اولدور كيم دين اوغروندا چاليشاسان، نفس ايله روز و شب جهاد ائده سن. اونون اثري جهد ائديب، ابليسين أوزه رينه غاليب اولماقدير. الدن گلديكجه مغلوب اولماماقدير.

«عبرت»]بودوركيم[ جان‌گؤزوآچيق اولا. هر نه‌يه باخارسا اوندان‌عبرت آلا. حقين حكمتين مشاهيده قيلا. اونون اثري«مقام منتها» يا قدم‌باسماقدير.

«حؤرمت»، كندي الي آلتيندا اولان كيمسه لره رعايت ائتمكديرو دادلي ]سؤز[ سؤيله مكدير. اونون اثري مهر و محبتدير.

«صحبت»، اولدوركيم مجليسلرده دانيشاركن، دوشونه رك، دانيشماق. اونون اثري معرفتدير.

«مروت»، اولدوركيم دوشماني قهر ائتمگه قادر اولا. اونا مروت گؤستريب عفو ائيليه. اونون اثري مدارا قيلماقدير.

«شفقت»، اولدوركيم ضعيف و مسكينلري گؤرنده، رحم ائديب، اسيرگيه، طريقت اهلي قارداشلارين هر بير حاجتين ]يئرينه[ يئتيره. اونون اثري محتاجليقدان خيلاص اولماقدير.

«اقرار»، اولدوركيم وعده يه خيلاف ائتمه مك، وعده سي ائتديكده يئرينه گتيرمكدير. اونون اثري، دوستلار يولوندا جان وئريب، طريقت ايچينده خاك اولماقدير.

«ايثار»، اولدوركيم، هر نه وار ايسه، دوست يولونا ساچيب، كندي اؤز جانيني ارنلر يولونا فدا ائديب باش ايله جاندان كئچمكدير. اونون اثري صاحيب اسرار اولماقدير.

«تولي» اولدوركيم اهلِ بيت رسولا محبت ائديب آل و اولادينا جان و كؤنولدن و درون دلدن اون ايكي اماما تابع اولماقدير. اونون اثري تركِ دونيادير.

«تبري» اولدوركيم محمد و علي حضرتلري دوشمانلارينا نفرت ائديب قاچماقدير.اهل بيته عدو اولان ملعونلارا لعنت قيلماقدير.اونون اثري محمد و علي دن غيريه كؤنول وئرمه ييب موراد آلماقدير. پس ايندي خليفه نين شرط و خاصيتلري بودور كه ذكر اولوندو».

 

7- 6. بو مقامدا شاه ختايي‌نين شعري

ناجي دئرلر بير گروها اوغراديم، 

هامي بير ـ بيري نين آلميش اليني.

هامينيزا هاردا دئديم، سؤيله ديم،

مكان توتموش حقيقتين ائليني.

 

گؤللرين لعل و گؤوهردن تؤكموشلر،

دوست باغچاسينا محبت اكميشلر.

............................................. [9]

اؤيرنميشلر او باغوانين ديليني.

 

سودو قدرت گؤللريندن آلينميش، 

دامازليغي او قيرخلاردان چالينميش.

اوروجو توتولموش، فرضي قيلينميش، 

اول حقه چئويرمه ميشدير داليني.

 

اگر عارف ايسن، سؤزومو ائشيت،

گئرچك عاشيق ايسن، حرفيني گؤزه‌ت!

قساوتي، كبري، كينه ني ترك ائت،

محبت سئليله دولدور گؤلونو.

 

عشقين شربتيندن ايچديم خاك اولدوم،

قدرت درياسينا گيرديم پاك اولدوم.

حقه اولاشديم، حقي گؤردوم، حق اولدوم،

اونون چين اراده ائتديم اؤلومو.

 

عشقين شربتيندن ايچن عاقيلدير،

قيرخلار نيشانين گؤسترن سائلدير.

شاه ختائي، خدمتينه قائلدير،

مولام اسيرگه سين مؤمن قولونو.

 

8- 6. مربي‌ليك شرطلري

بوندان سونرا، مربي شرطلرين و نيشانلارين بيان ائدر. بير كيمسنه مربي ليك ائديب، طاليب گتيرمه لي اولسا، گركديركيم حلقه صحبتده حاضير اولان حق اهلي قارداشلار، اونا نظر ائديب گؤره لر ظاهير و باطين اول كيمسنه لرده، مربي ليك نيشاني وارميدير، يوخسا دگيلدير.

پس ايندي، بير كيمسنه مربي اولماييب، طاليب گتيره مربي ليك ائيلسه، طريقت ايچينده اركان دگيلدير. زيرا بير كيشي يول بولمايينجا، قيلاووز[10] اولمانين نه معناسي وار؟ همان بيهوده امك چكر. اگر اول كيشي مربي ليك ائتمك موارد ائدرسه، گركدير كيم اوچ شرطي، دؤرد نيشاني اولا.

اول سر نيشانلار، هر كيمده بولونمازسا، لاييق شاه و مقبول درگاه دگيلدير. اول نيشانلار هر كيمده بولونارسا، مربي ليك ائتمگه لاييق اولور. شؤيله معلوم اولا.

1- 8- 6. اول شرط: ايندي مربي ليگين اول شرطي بودور كه مربي، كؤپرو كيمي اولا. زيرا داهي، اول كؤپرونون يانلاريندا قورخولوق گيبي دير، اول طاليبي، كؤپرودن دوشمگه قويماز.

2- 8- 6. ايكينجي شرط: ايكينجي شرط اولدوركيم كيشي قلبي واسع اولا. هئچ داريلمايا، قاغييب كيمسه يه، كيشي صورت گؤسترمه يه، گولر اوزلو، شيرين سؤزلو، نفسي حليم و قلبي سليم اولا.

3- 8- 6. اوچونجو شرط: اوچونجو شرط، اولدوركيم، مربي اولان كيشي، هئچ بير نسنه دن اكراه ائتميه، كم نظر ايله باخمايا، كيمسه نين خاطير ]و[ كؤنلون ييخمايا. جمله ياراديلميش مخلوقاتا بير گؤز ايله باخا، قادر اولدوغو قادار، هر كيشي نين كؤنلونه گؤره ...

 

9- 6. مربي‌ليك نيشانلاري

1- 9- 6. [بيرينجي نيشان]: [بيرينجي نيشاني] اولدور كيم بو عالمده هر نه كه وارسا، بولا. كندونده هر نه كه مشكل وار، حق قاتيندا حاصيل اولا.

2- 9- 6. ايكينجي نيشان: و داهي مربي ليگين ايكينجي نيشاني اولدور كيم زباني آري اولا، كيمسه يه آزارليق يئتيرمه يه و كيمسه اوندان رنجيده اولمايا و كنديسيندن خيلاف سؤز گلمه يه.

3- 9- 6. اوچونجو نيشان: مربي ليگين اوچونجو نيشاني اولدوركيم، ستار اولا، كيمسه نين عيبينه باخمايا. گؤز ايله گؤردويون اتك ايله اؤرته و كيمسه نين عيبيني اؤزونه اورمايا.

4- 9- 6. دؤردونجو نيشان: و داهي، مربي ليگين دؤردونجو نيشاني اولدوركيم مربي اولان كيمسه گركدير دونيايا ميل محبت ائتميه، حق يولونا واريني صرف ائده، باش و جاندان كئچميش اولا، فنا شربتيني ايچميش اولا.

 

10- 6. شيخ صفي‌ حضرتلري‌نين بويوردوغو

شو نيشانلار كه دئديم، هر كيمده بولونورسا، اهل حالدير. مربي ليك قاپي سيني بو يئددي دورلو ]شرطلر و[ نيشانلاري داشيان كيشيلردن هر كيم بو طريقه گؤره حركت ائدرسه و بو ترتيب اوزه ره يئريرسه، مربي ليك اونون حقي دير.

داهي بير قارداش كيم درگاها گلميش اولمايا، خليفه اوغلو اولمايا و سكه خانه‌دن‌گلميش اولمايا، طاليب توپلاييب مربي‌ليك ائده‌جك اولورسا، اوزو قارا اولار. و همده اركان دگيلدير، يول قارداشلاريميز سؤيله معلوم.

 

11- 6. شاه ختايي‌نين بو مقامدا شعري

علي اسماعيلم گلديم، سئيران ائيله ديم،

ذوالفقار دورماز قينيندا، گونده يوز مين قان ائيله ديم.

گؤرورم ديوان دوزه ني، قيرارام يولدان آزاني، 

يئني باشدان بو دوزه ني، بير قديم اركان ائيله ديم.

مينرم دولدولو آتي، كيمسه بيلمز بو صيفاتي، 

ويلايتي، كرامتي، طريقتده كان ائيله ديم.

شاهِ عادلم بورادا يوخدور ساني قاپيميزدا، 

سفيللرين، هاميسيني جانيما جانان ائيله ديم.



[1] بقره/ 30.

[2] داوود پيغمبره زبور گؤنده‌ريلدي (نساء/ 363 و اسراء/ 55). بو كيتاب بئش بؤلوم و 150 مزموردان عبارتدير. داوود پيغمبر ميلاددان 1081 ايل قاباق بيت لحم‌ده دوغولدو. الله اونا ياخشي سس وئرميشدي (ص/ 19).

[3] سليمان حضرت داوودون 20- نجي اوغلو ميلاددان 1003 ايل قاباق پيغمبر اولدو. الله حيوانلاري اونا لشكر ائتدي (نمل/ 17). قرآندا سليمان پيغمبرين آدي 17 دقعه ذكر اولونور.

[4] خضر: قرآندا حضرت خضرين آدي كهف سوره‌سينده ذكر اولور (آيه 60). حضرت موسي اوندان علم اؤيرندي.

[5] يوسف: قرآن يوسف ناغيليني احسن القصص آدلانديرير (يوسف/ 3). ماجراسي معروفدور.

[6] اسكندر: قيليپ اوغلو اسكندر مقدوني، مصر، ايران و هيندستاني فتح ائتدي، ايراندا فساد مركزي اولان تخت جمشيدي داغيتدي. ميلاددان قاباق 323 ايلينده اؤلدو. بير آدي‌دا ذوالقرنين دير (كهف/ 83- 94).

[7] اييجه (iyice): ياخشيجا، ئييجه.

[8] آب حيات (ياشاييش سويو): سومر توركجه‌سيله يازيلان گيلگميش (gilgamish) حكايه‌سينده ياشاييش بيتگي‌سيندن سؤز گئدير و لاكين ياشاييش سويو ايلك اؤنجه قينيقيلر طرفيندن يازيلان اسكندر اسوري‌سينده ذكر اولونور. افسانه‌لره گؤره بير دامالا ياشاييش سويو سبب اولدو مجمع البحرين ايجاد اولسون و حضرت مسيح دئميش كه هر كيم اوندان بير داملا ايچرسه،  هئچ سوسوماز (قاموس كيتاب مقدس- 1) اسلامي روايتلرده اونا «خضر بولاغي» و «خضر سويو» آد وئريليب. سومر توركجه‌سيله يازيلان لوحه‌لرده ياشاييش سويونون آللاهي «ايه» (aye) آدلانير. ايندي اردبيل لهجه‌سينده ايشلنن «اده» (ade) سؤزو، همين كلمه‌دن گلير.

[9] بير مصراع دوشموشدور.

[10] قيلاووز (qilavuz): راهنما، راهدان، مرشد.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : شیخ صفی الدین اردبیلی به روایت دکتر صدیق,شناختنامه شیخ صفی الدین در پژوهشهای دکتر حسین محمدزاده صدیق, قارا مجموعه دکتر حسین محمدزاده صدیق, شیخ صفی الدین اردبیلی از دیدگاه حسین محمدزاده صدیق,شیخ صفی الدینین یول اهلینه قیلاووز رساله‌سی,
ارسال در تاريخ شنبه 8 مهر 1391 توسط دکتر صدیق. ارسال: سید احسان شکرخدایی