تبلیغات اینترنتیclose
شیخ صفی الدین ین البویوروق رساله‌سی - 3
شیخ صفی الدین اردبیلی در پژوهشهای دکترحسین محمدزاده صدیق
شرح احوال، افکار و آثار شیخ صفی الدین اردبیلی بر اساس تحقیقات استاد دکتر حسین محمدزاده صدیق
موضوع : البویوروق رساله‌سی, | بازدید : 582

 19- 5. آلتي قوول

شيخ صدرالدين حضرتلري سئوال ائتدي: «يا شيخ! اوليانين اول آلتي قوولو نه دير؟ بويورونوز، اونو داهي بيله ليم، قادر اولدوغوموزجا موجبينجه عمل ائده ليم».

شيخ صفي حضرتلري بويوردولاركيم: «اول آلتي قوولون بيرينجي‌سي نماز نيازدير. ايكينجي‌سي بودوركيم مجاهيده دير. طاليب بيرـ بيرينه چوخ وارماق گرك. اوچونجوسو طاليب اولان كيشي عوام ناسدان منقطع اولوب كسيلمكدير و عوام لوقمه سين يئمه مكدير و كندي داهي عوامه لوقمه سين يئديرمه مكدير. دؤردونجوسوطاليب اولان كيشي‌نين تقواسي تميز اولماق گرك. بئشينجي دائماً پاك طهارتلي اولماق گرك. هر حال اوزه رينه قارشي دوشمك جائز دگيلدير».

دينله نفسين جانلي دير،               

دوتميانلار قانلي دير.

ختــائي! حذر ائيله،                    

بو يول نه دير؟يانلي دير.

داهي اوليانين آلتينجي قوولو اولدوركيم دائماً ذكر ايلاهي ديلينده ويرد ائيليه. اول ذكرين نوري قلبينه دوشه. ليلاً و نهاراً، سرّاً و جهراً. توحيد ائيليه. گئجه و گوندوز گيزلي و آشيكارا توحيد كلمه سين سؤيليه و هم نفس امّاره نين كؤكونو قازا و كندوسونو تقوايا ايرگوره.[1] اول كيمسنه راه تقوايا كؤنول باغلاييب جلا وئره. هاچان بير طاليب بو آلتي قوولو يئرينه گتيرسه، اوليا ايله اون ايكي قوولو يئرينه گتيرميش گيبي اولور.

اما اوْل اون ايكي قوولون آلتيسي كيم اوليانيندير، بيانا گلمز. ديل ايله شرح اولماز. اول مقام حالدير، قال دگيلدير. و داهي طاليب اولدوركيم گوندوزو كثرتده اولورسا، گئجه سي وحدتده اولا. زيرا كيم گئجه اوليا بازاري، گوندوز خلق بازاري دير.

 هاچان بير طاليب هر گون خلق اوزونه باخيب خلق ايله اختلاط ائيلييه، اول طاليب مين درجه قطع منازل ائتمك دن گئري قالير. پس ايندي طاليب اولان كيشي گركدير گوندوز خلق ايله معامله ائدرسه گئجه، حقّ ايله معامله ائيليه».

 

20- 5. گئجه‌نين بئش بؤلومو

شيخ صفي الدين حضرتلري بويورور: «صوفي گركدير بير گئجه]ني[ بئش قيسم اوزرينه تقسيم ائيليه:

اوّل قيسم: طاعت و عبادت ايله مشغول اولا. ايكينجي قيسم: قال و قيل دن فراغت ائديب راحت ائتمگه مشغول اولا. اوچونجو قيسم: صحّت ائتمگه مشغول اولا. دؤردونجو قيسم: وحدت ائتمگه مشغول اولا. بئشينجي قيسم: خلوت ائتمگه مشغول اولا.

شيخ حضرتلري بو منوال اوزه‌ رينه دائماً عبادت ائتميش ايدي زيرا كيم نفسي، مجاهيده، بوتدان نجات وئرير. اونون ايچون كيم بيرگئجه نين اون ايكي ساعتيني بئش قيسم ائديب و هر قيسمي بير دورلو حال اوزه رينه كئچيرسين و هر حال «سرّ» اوزه رينه. اول طاليب اولان كيشي كندو شؤيله تقسيم ائيليه.»

دئميشدير: «اما طريق دوشماني واردير. اونلاردان حذر ائدينيز و قورخونوز».

 

21- 5. طريق دوشماني

شيخ صدرالدين آييتدي: «يا شيخ! طريق دوشماني كيملردير؟ بويورونوز بيله ليم».

شيخ صفي الدين - عليه الرحمه- بويوردوكيم: «طاليبين ديْشاريسي خلقدير و ايچريسي اوليادير. اولياء پاكدير. اؤيله اولسا، طاليب گركدير ظاهير و باطيني پاك اولا. هاچان بير طاليب، اولياء مقامين خلقه گؤسترسه، هم طريق دوشمانيدير و هم بيزيم دوشمانيميزدير. «لا فتي الّا علي لا سيف الّا ذوالفقار».

پس ايندي طاليب اولدوركيم طاليبي قوخوسوندان[2] بيله. زيرا اولياء قوخوسو طاليبده دير. هاچان بير طاليب اول قوخويو بيلمه سه، اوليادان جدا اولور و بير طاليبده كيم اول قوخو اولمازسا , طاليب دگيلدير. دونيادان آخرته ايمانسيز گئدر.

و داهي بيركيمسه، اولياء تاجين اؤرو[3] نسنه يه بوراخسا، اول جدادير. اونلاردان قاچماق گركدير. اگر قاچمازلارسا كنديلري داهي اونون كيمي جدا اولورلار. اولياء اركانيندان محروم قاليرلار».

 

22- 5. منافيقه لوقمه يئديرمه

و يئنه شيخ صفي حضرتلري بويورور: «جناب حق حضرتلري، طاليبين كؤنلونه بير محكم قلعه ياپميشدير. سؤيله كيم اول قلعه يئتميش قاتدير. بو دونيادان آرتوقدور و هم يئتميش بارگاهي واردير، اوليانين بارگاهيدير. ايندي هر هانسي طاليب كيم منكر و منافيقدن سيرّيني ساخلاماسا و هم لوقمه سيني منكر و منافقه يئديرسه، اول قلعه يي خراب ائتميش گيبي دير».

شيخ صدرالدين آيدير:«يا شيخ! طاليب بيرـ بيريله نئجه ديريلسين؟ اونو داهي بيان ائيله بيله ليم».

شيخ صفي الدين عليه الرحمه بويوردو كيم: «هاچان بير طاليب بير طاليبين ائوينه وارسا اول ائو صاحيبي اولان طاليب گركدير كيم اونا عزّت و حرمت ائديب هر نه قده ر اولسا موجود بولوناندان مئيدانا گتيره و اونون قدمين مبارك بيله.گلديگيندن صفالار حاصيل ائده.

اگر اول طاليب، اونون گلديگيندن صفا و شوق حاصيل ائتمه ييب درونوندان اونا محبت گؤسترمه ييب واريني اوندان دريغ ائده، لوقمه سيني ساخلاسا، جناب حق و اولياء قاتيندا اوزو قارادير. اقراري صاف دگيلدير. و داهي بير طاليب لوقمه سين منكره و منافيقه يئديرسه، يتيم اتيني يئديرميش گيبي دير و داهي بير طاليب كندي اؤز اتين بير منكره وئرسه، اون ايكي امامين اتين يئديرميشجه، گوناه حاصيل ائدر».

 

23- 5. اهل عيال اداره‌سي

شيخ صدرالدين آييتدي: «يا شيخ! طاليب، اهل عيالي ايله نئجه اداره ائتسين؟».

شيخ صفي - عليه الرحمه- بويوردوكيم: «هاچان بير طاليبين خاتونو بير اولياء دوشمانينا گؤرونسه، يئنه اول طاليب اونونلا جمع اولا، خنزير ايله جمع اولموش گيبي دير. اوندان زياده احتراز اوزه ره اولماق گركدير. پس طاليب اولان كيشي، اولياء ايزين ايزله ييب مرشد رضاسيني گؤزله ييب امرينه گؤره عمل ائتمك گرك تا كيم تانري دوستو اولا. زيرا كيم اوستاد نفسي طريقتده ايماندير. شؤيله بيله لر.

قوله تعالي:‌«انّا عَرَضنَا الاَمانةَ عَلي السَّمواتِ و الاَرضِ».[4] يعني دئمك اولاركيم: عرض ائيله دي امانتي يئرلره و گؤيلره، اول امانت كيم الله تعالي حضرتينين دير، داغلار طاقت گتيرمه ييب قالديرا بيلمه ديلر و اول امانتي، جناب حق حضرتلري، حضرت آدم عليه السلاما وئردي. آدم عليه السلام، حق امريني قبول ائديب قالديردي».

 

24- 5. يئددي صيفت

شيخ صدرالدين آييتدي: «يا شيخ! اول امانت نه ايدي كيم يئرلر و گؤيلر تحمل ائدمه ييب گؤتوره بيلمه ديلر و داهي انسان گؤتوردو؟».

شيخ صفي الدين آييتدي:«اول امانتلر بونلارديركيم: ال،آياق،گؤز، قولاق، ديل، دوداق و نطق. بو يئددي قاپي، اخلاص اصلي ديركيم يئددي صيفتدير. نه قده ر صيفتلر وارسا، بو يئددي صيفاتدان حاصيل اولور و بير داهي شهوات نطفه دير.

صوفي گركدير بو يئددي قاپويو ضبط ائديب محلّينه صرف ائيليه. جهنّمين قاپيسي اونون اوزه رينه باغلي اولا.

و داهي درويشليك و صوفي ليك اولدوركيم «نفس امّاره» يي قتل ائده، كندوسيني لواميه ايرگوره. قولي تعالي:«اِنَّ النَّفس لاَمّارَةٌ بِالسّوءِ»[5] يعني: بير كيشي نفسينه اويوب , امّاره ايله عاميل اولورسا اول كيشي كندوسونه ظلم ائتميش اولور. صوفي گركدير شهوت اليندن بيچاره و ذليل اولمايا. قادر اولدوغو قده ر منع ائيليه. شهوت آتشين سؤندوره.

آخماقدير اول كيشي كيم نفسين ديله گين وئره و عاقيلدير اول كيشي كيم نفسيني قتل ائده. كنديسيني «ملهمه و مطمئنه» ايرگوره. بونلارينكي نه كيم وارسا، بو يئددي صيفتدن قوپار.

ايندي بير طاليب كي بو مذمومه صيفتلري ترك ائدرسه، انسان درجه سينه طريق بولور. نفس «مطمئنه» آياق باسار. اول واخت كؤنلو و گؤزو آچيلار. عشق آري[6] اولار. زياده محبت حاصيل اولار. صفاي قلب ائدر. هانسي طاليب كي بو مرتبه يه ايرسه، انسان كامل اولموش اولور».

 

25- 5. يول ايچينده

شيخ صدرالدين آييتدي: «يا شيخ! طاليب يول ايچينده نئجه گركدير؟ بويور، ائشيده ليم و بيله ليم».

شيخ صفي الدين حضرتلري بويوردوكيم: «طاليب اولان كيشي، دوه و ائششك و خنزير گيبي گرك اولسون. يعني بونون تمثالي بودور كي دوه گؤتوروجودور و هم قاطار ايچينده دير. بير كيمسه مهارينا ياپيشسا قالان دوه لر جمله سي اونون انسه سينجه گئده رلر. سانما كي مخالفت ائده رلر. پس طاليب داهي گركدير دوه گيبي قاطار ايچينده يوك گؤتوروجو اولا و رهبر ايله مخالفت ائتميه.

مرشد سو گيبي دير. سو هر نه يه توخونسا، آريدار. پاك ائدر. مرشد داهي طاليبين كؤنلونو تميزلر. مرشد كاميل , آدمي جام جهان نما ائدر. «جام جهان نما» نه دير؟ آئينه خدا دير و جمعيت اولدوغو يئرده حاضير اولا، بير معناي معرفت حاصيل ائده.

و خنزير داها دوغرولدوغو يئرده دؤنمز. طاليب داها گركديركي دوغرولدوغو يئردن دؤنميه. صراط المستقيمده دوغرو يئرييه و دوغرو سؤيليه. دوست كؤنلونوآغريتمايا. كؤنلو درويشليكده، ديلي مروّتده اولا تا كي بو يولدا مقصودونو بولا. داهي بير طاليب، ايكي كؤنلو بير ائديب اؤلورسه، منافيقدير».

 

26- 5. اؤلومسوزلوك

شيخ صدرالدين آييتدي: «يا شيخ! مروّت نه دير؟ بيان ائيله بيله ليم».

شيخ صفي الدين حضرتلري آييتدي: «بير طاليب اولياء كلامين ائشيده، حق بيله، اوليانين مناقيبين دينليه، هر نه دئيرسه اونا گؤره عمل ائيليه و مرشدون امريني يئرينه گتيره، اول طاليبه هرگز اؤلوم يوخدور. دونيادان آخرته ايمان ايله گئده. جمله انبياء و زمره اولياء اوندان خشنود اولا. جناب حق حضرتلري اوندان راضي اولا و جماليني گؤستره».

 

27- 5. اوليادان اوز دؤندرمه

شيخ صدرالدين آييتدي:«ياشيخ! بيرطاليب اوليادان اوز دؤندرسه, حالي نئجه اولور؟»

شيخ صفي حضرتلري بويوردو: «بير طاليب اوليادان اوز دؤندرسه، پيردن دؤنموش اولور. پيري قبول ائتمه ميش، ابليسي قبول ائتميش اولور. منكردير. منافقدير. اوز قارادير. دونيادان آخرته ايمانسيز گئدر.

بير طاليب، بير طاليبه نفس وئرسه، بير گون وعده ايله اوچ گون اولسا، يئددي گون اولسا، وارماسا يا اون ايكي گون اولسا وارماسا اول طاليب نفسه جان بولدورماسا، اول نفسدن اؤترو، طاليبلر اونونلا دوروب اوتورماسينلار. اقرارينا جان بولدورمايينجا، هركيم اونونلا دوروب اوتورسا، اولياء نفسينه ايمان گتيرمه ميش اولور. اوزو قارا اولور.

الّا مگر كيم اول طاليبين عذرو اولموش اولا. اؤيله اولونجا وعده سينه خيلاف ائتميش اولماز. گليب مروّت دئديكده قبول ائده لر. زيرا كيم «العذر عند كرام الناس» مقبول دئييب بويورموشلار گرك. اول طاليب، بو طاليبلردن اوز دؤندرسه، منافيقدير».

 

28- 5. منافيق كيمدير؟

شيخ صدرالدين آييتدي: «يا شيخ! منافيق كيملردير؟ بيزه بيان ائله، بيله ليم».

شيخ صفي الدين - عليه الرحمه-  بويوردو كيم: «بير كيمسنه اولياء كلامين ائشيديب حق بيلمه سه و اونا گؤره عمل قيلماسا، كؤنلو صاف اولماسا، كين، كبر، حسد، بغض، بخل، طمع ايله غيبت [و] مَساوي اولسا، منافيقدير. و داهي منافق اولدوركيم بير كيشي نين اوزونه بير دورلو و آردينا بير دورلو سؤيليه. و منافيق اولدوركيم اوليايا ديل ايله اقرار وئريب ايمان گتيره اما كؤنولده، تحقيق، اعتقاد ائديب اينانميا.

قوله تعالي:«انَّ المُنافِقونَ هُمُ الكافِرون». منافيق كافردن اشدّدير. اونون چون كيم ظاهير]ده[ كافر، كلمه شهادت گتيرمكله مسلمان اولور. اما منافيق ايكي اوزلو، ايكي ديللي، ايكي كؤنوللو اولور. اونلاردان قاچماق گركدير. زيرا اونلار اولياء دوشمنلريديرلر و اونلارين مكاني دوزخ دير».



[1] ايرگورمك (irgürmek): اولاشديرماق، اريشديرمك، يئتيشديرمك.

[2] قوخو (qoxu): عطر، ايي.

[3] اؤرو (örü): اوت علف، بيتگي.

[4] احزاب/ 73.

[5] يوسف/ 53.

[6] آري: خاليص، صاف.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : شیخ صفی الدین اردبیلی به روایت دکتر صدیق,شناختنامه شیخ صفی الدین,دکتر حسین محمدزاده صدیق و شیخ صفی الدین,دکتر صدیق و قارا مجموعه,حسین محمدزاده صدیق و شیخ صفی الدین اردبیلی,شیخ صفی الدینین البویوروق رساله‌سی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی