تبلیغات اینترنتیclose
توركجه‌ميزين املاسي و قارا مجموعه کیتابی (دکتر حسین محمدزاده صدیق)
شیخ صفی الدین اردبیلی در پژوهشهای دکترحسین محمدزاده صدیق
شرح احوال، افکار و آثار شیخ صفی الدین اردبیلی بر اساس تحقیقات استاد دکتر حسین محمدزاده صدیق
موضوع : قارا مجموعه کیتابی, | بازدید : 504

 

بيلينديگي كيمي توركجه‌ميز، سومر (Sümer)، گؤي تورك (Göy Türk) و اويغور (Uygur) الفبالاريندان سونرا، توركلرين اسلاميته بويون اگديكلري ايله علاقه‌دار، قرآني الفبا ايله يازيلميشدير. مسلمانلار همين الفبا ايله، توركجه‌ميزده بير دريا نظم و نثر اثرلري ياراتميشلار.

اسلام الفباسي‌نين توركجه‌ميزين تاريخ بويونجا، چئشيدلي اقليملرده، مختليف منيمسه‌مه‌لري اولموشدور، اودور كه بيزيم عصريميزه كيمي ثابت بير املا قايدالارينا گليب چاتماميشدير. ولاكين، هر دؤرده اؤزونه مخصوص قايدالاردان تبعيت ائتميشدير.

هيجري اوچونجو عصردن آلتينجي عصره قده‌ر، قرآني الفبا ايله يازيلان توركجه متنلريميز، اعرابلي و حركه‌لي اولموشدور. اليميزده اولان نهج الفراديس اثري و يونس امره‌نين ديواني اليازمالاريني ميثال كيمي گؤسترمك اولار.[1]

سونرا، سسلي حرفلري الفبا سيستمينه داخيل ائتمكله، حركه‌لي يازما ايشي قالديريلميشدير. خصوصيله صفوي دؤروندن اؤلكه‌ميزده توركجه متنلر گؤزل نستعليق خطي ايله و حركه‌سيز يازيلميشدير.

املا شيوه‌لريميز حله‌ لازمي قده‌ر دقتله اؤيره‌نيلمه‌ميشدير. قاجار دؤرونون سونلاريندا نشر اولان توركجه كيتابلاريميزين املاسي، صفويه دؤرو املاسي ايله چوخ فرقلي حاللار داشيير و چاغداش املاميز ايسه، حله ثابت بير نقطه‌يه گليب چاتا بيلمه‌ميشدير.

پهلوي رژيمي و شوونيزمي‌نين توركجه‌ميز ايله دوشمنليگي، املا قايدالاريميزدا، قارما- قاريشيقليغا يول آچان اساس عاميل كيمي دگرلنديريلير.

بونونلا بئله، ضياليلار جوره- جوره املا شيوه‌لري ابداع ائتمكده ديرلر ولاكين بئله نظره گلير كه بيز علمي اصللره اويغون و عموم خلقين منيمسه‌ديگي بير املا شيوه‌سيندن حله‌ليك تبعيت ائتمه‌لييك و قارا مجموعه‌نين چاغداشلاشميش املاسيني‌دا بئله بير شيوه ايله نشر ائديريك.

الينيزده اولان جيلدده، شعرلرين املاسيني چاغداشلاشديرديق ولاكين نثر پارچالاريني اولدوغو كيمي‌ده تقديم ائديريك. بو شيوه‌لرين نشري، گنجلريميزين املا تاريخي سئيريني اوخويوب اؤيرنديكلرينه ال وئريشلي بير وسايط حاضيرلايا بيلر. قارا مجموعه‌نين نثر حصّه‌لري‌نين بعضي املا اؤزلليك‌لريني آشاغيدا شرح ائديريك:

1- 8- 1. توركجه‌ سؤزلرين املاسيندا: بعضي واخت قانونسوزلوق گؤزه دگير. يعني بير صحيفه‌ده و بير متنده، بير كلمه جوره – جوره املالار ايله يازيلير.

ميثال:

گبي، گيبي، گب، گيب.

ايله، اله، الا، ايلا.

نجه، نيجه، نيچه، نچه.

اوله، اولا، اله، الا.

2- 8- 1. ب/ پ، ج/ چ، د/ ط، س/ ص حرفلري توركجه‌ سؤزلرده قاريشيق وضعيتده ايشله‌نيلير.

ميثال: پاشا/ باشا، جونكي/ چونكي، چري/ جري، جكسه/ چكسه، صو/ سو، سانكي/ صانكي.

3- 8- 1. توركجه‌ده ايشلنن عربجه و فارسجا سؤزلرده عموميتله توركجه تلفظ اساس ساييلمير و اولدوغو كيمي يازيلير:

حاضر، افطار، بيت، سماع،‌ نماز، مجلس، غالب، عقل، نقل و . . .

بيز بو سؤزلرين املاسيني بعضاً دگيشديك. ميثال: مجليس، عاغيل و . . .

4- 8- 1. بعضي واخت توركجه‌ميزده ايشلنن عربجه و فارسجا سؤزلر، توركجه تلفظ ايله يازيلير:

ميثال: اوميد (اميد)، تز (تيز)، زيره (زيرا)، دوشمان (دوشمن)، خوجه (خواجه)، صپاره (سه پاره).

5- 8- 1. غير ملفوظ هايا ختم اولان عربجه و فارسجا سؤزلرده، توركجه اكلر ايله بيرلشنده، غير ملفوظ ها دوشور.

ميثال: قافلدن (قافله‌دن)، توبسي (توبه‌سي)، زمرسنه (زمره‌سنه)، معامليه (معامله‌يه)، خزينلر (خزينه‌لر)، مكدن (مكه‌دن)، سايسنده (سايه‌سنده).

6- 8- 1. توركجه سؤزلرده بير چوخ يئرده سسلي حرفلر ايشلنمير و سسليلرين يئرينه حركه ايشلنير. بو، ان اسكي توركجه املا قايداسي حساب اولونا بيلر.

ميثال: قينندن (قوينوندان)، بيرغن (بويروغون)، الر (ايله‌ري)، صكجي (سون اوجون)، گمي (گمي‌يه)، اچند (ايچينده)، برقدغ (بوارقدوغو)، ورلر (وئره‌لر)، قند (قوندو)، دو (دوه)، دد (دده)، استند (اوستونده)، دبرغ (توپراغين)، اد (ايدي)، ادر (آيدر)، ات (ائتدي)، گلد (گلدي)، كلكسي (كؤلگه‌سي)، اتدي (آييتدي)، ايغل (آياغي ايله)، كوكلك (گونلوك)، قنق (قانقي= هانسي) و . . .

7- 8- 1. مالكيت اكي اولان –in ، بعضي واخت «ن» و بعضي واخت ايسه «ك» صغير كاف ايله گؤستريلير. ميثال: سزلرك (سيزلرين)، كوكلكي (كؤنلونو)، اوزك (اؤزون)، جمله كزك (جمله‌نيزين)، دلمدكك (ديله‌ ديگين) و . . .

8- 8- 1. بعضاً عطف و اوي قاباقكي كلمه‌يه ياپيشير.

ميثال: جانوباش (جان و باش)، جانوككدك (جان و كؤنولدن) و . . .

9- 8- 1. توركجه سؤزلرين، ديالكتولوژيك املالاري، عموميتله اردبيل لهجه‌سينده اولموشدور. بودا گؤسترير كه قارا مجموعه متنلري‌نين ايلك يازان عاليملري، اردبيلليلر اولموشلار و ادعا ائتمك اولار كه بيزيم تصوّفي متنلريميزين ديل قايداسي گئديشي، اردبيل آغزي اساسيندا قورولموشدور. باشقا سؤزله دئسك، اردبيل آغزي، توركجه عرفاني متنلريميزين شاه بئيتي حساب اولونور. بو شيوه عموميتله فعللرين تلفظ‌لرينده ساخلانيلميشدير.

ميثال: چلنور (چالينير)، گتور (گتير)، واردوغندان (وارديغيندان)، يومشاغ (يوموشاق)، بيراغور (بوارخير)، يتشور (يئتيشير).

بو اؤزلليكلري آرتيرماق اولار. نشر ائتديگيمز متنلر، املا خزينه‌سي كيمي نظر دقته آلينماليدير. بيزدن قاباق قارا مجموعه‌نين بعضي پارچالاريني نشر ائدن عاليملرده همين مسأله‌يه دقت ائتميشلر.[2]

بيز بورادا وئرديگيميز بوتون متنلري املا باخيميندان چاغداشلاشديرديق. و اسكي املا فورمالاريني كيتابين سونونا ضميمه ائتديك.



[1] بو ايكي اِعرابلي اليازمانين فتو صورتي نشر ائديلميشدير. باخ: نهج الفراديس، تورك ديل قورومو نشري، آنكارا، 1948. - و- يونس امره، ديوان، تورك ديل قورومو نشري، آنكارا، 1989.

[2] او جمله‌دن مرحوم فاخر ايز اسكي تورك ادبياتيندا نثر مجموعه‌سي (استانبول 1946) و احمد حامد الصراف اشبك كيتابي (بغداد 1954) نشرينده بو مسأله‌يه دقت ائتميشلر.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : شیخ صفی الدین اردبیلی به روایت دکتر صدیق,شناختنامه شیخ صفی الدین در پژوهشهای دکتر حسین محمدزاده صدیق, شیخ صفی الدین از دیدگاه دکتر محمدزاده صدیق,دکتر محمدزاده صدیق و قارا مجموعه, قارا مجموعه شیخ صفی در تحقیقات دکتر حسین محمدزاده صدیق,تحقیقات دکتر حسین محمدزاده صدیق پیرامون شیخ صفی الدین, تحقیقات دکتر حسین محمدزاده صدیق پیرامون قارا مجموعه شیخ صفی الدین اردبیلی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی