تبلیغات اینترنتیclose
شیخ صفی الدینین قارا مجموعه‌سی الیازمالار آراسیندا
شیخ صفی الدین اردبیلی در پژوهشهای دکترحسین محمدزاده صدیق
شرح احوال، افکار و آثار شیخ صفی الدین اردبیلی بر اساس تحقیقات استاد دکتر حسین محمدزاده صدیق
موضوع : قارا مجموعه کیتابی, | بازدید : 537

بشر تاريخينده، مسلمانلار قده‌ر باشقا امت و ملّتلر كيتاب يازماميشلار. مسلمانلار عموميتله توركجه، عربجه و فارسجا اولاراق، يوز مينلر علم، ادبيات و اينجه صنعت ساحه‌لرينده كيتابلار يادگار قويموشلار. بو كيتابلار اليازمالار شكلينده بيزيم اليميزه گليب چاتميشدير. ايندي دونيانين كيتابخانالاريندا، ايكي ميليون جيلده ياخين توركجه، عربجه و فارسجا اليازما ساخلانيلير كه اونلارين يالنيز اوچده بيري‌نين فهرستي يازيلميشدير و فهرستي يازيلان اليازمالارين ايسه يالنيز يوزده اونو چاپ اولونموشدور.

البته وئرديگيميز بو بيلگي هر أوچ ديلده يازيلان اثرلره عائددير. توركجه‌ميزه گلديكده، دوروم، داهادا آجيناجاقلي‌دير. ميثال ايچون اؤلكه‌ميز ايرانين كيتابخانالاريندا ساخلانيلان توركجه اليازمالارين يوزده دوخسان بئشي حله فهرست اولماميشدير. يالنيز مشهدده آستان قدس رضوي و قم شهرينده آيت الله نجفي مرعشي كيتابخانالاري، بعضي توركجه اليازمالاريني داغينيق حالدا فهرست ائتميشلر و تهرانين ملك كيتابخاناسي اليازمالار فهرستينده توركجه بؤلومو آيريلميشدير. تبريزين تربيت و ملي كيتابخانالاري و ها بئله تهرانين ملي، شهيد مطهري و اسلامي شورا مجليسي كيتابخانالاري‌نين فهرستلرينده ايسه داغينيق حالدا بعضي توركجه اليازمالارين توصيفلرينه قاباق گليريك.

بو توصيفلر ايسه هاميسي فارسجادير و بير چوخو مختصر و يانليش معلومات وئرير. و داها آجيناجاقلي بوراسي كه فهرست اولان بو يوزده بئش اليازمانين، اينديه كيمي هئچ بيريسي نشر ائديلمه‌ميشدير.

فهرست اولمايان توركجه اليازمالار ايسه، زمانه بلالاريندان قورتولوب قالان بؤيوك بير مدني ميراث كيمي ايندي، بيولوژيكي عاميللر، موذي بؤجكلر، گون ايشيغي و يا رطوبتلي هاوا شرايطي آلتيندا، اؤلكه‌ميزين مهم كيتابخانالاري‌نين زئرزمينلرينده چورومكده‌ديرلر.

كئچميشده توركجه اليازمالارين امحاء ائديلمه‌سي،‌ ايراندا، حاكيملر طرفيندن بير «ملي وظيفه» كيمي قلمه آلينيردي. بير روايته گؤره افغان ياد ائلليلري اصفهاني اله كئچيرتديكدن سونرا، اصفهانين بؤيوك حاماملاريني قيزديرماق ايچون، توركجه كيتابلاري آلتي آي يانديرديلار. پهلوي زمانيندا ايسه ساواكين گيزلي فرماني ايله،‌ قالاق- قالاق توركجه اليازمالار امحاء ائديلميش و آرادان آپاريلميشدير و توركجه‌ميز، علم و يازي ديلي يوخ، بلكه «فحش و دشنام و اوباش و اراذل» ديلي كيمي تانيتديريلميشدير. تهران دانشگاهي‌نين مركزي كيتابخاناسيندا ساخلانيلان بير چوخ اليازمانين سون حصّه‌لري امحاء ائديلميشدير و امحاء ائديل بؤلومون يئرينده يازميشلار:«چون مابقيِ اثر هم تركي بود و هم خالي از هرگونه فايده ادبي، از گنجاندن آن در برگه‌دان خودداري گرديد.»

قالان اليازمالاريميزي قوروماق، مرمّت ائتمك و ساخلاماق اسلام مدنيتي ايچون چوخ اهميتلي‌دير. مسلمانلار، اليازمالار واسيطه‌سي ايله چوخ بؤيوك و عجايب بير مدني ميراث قويوب گئتميشلر كه بو ميراثين بؤيوك بير بؤلومو توركجه‌دير. بو، اينانيلماز درجه‌ده قيمتلي بير ميراثدير و بيزيم ايندي او اثرلر صاحيبلري‌نين آدلاريندان، اؤزوموزون خبريميز يوخدور. بو بؤيوك و افتخارا شايان علمي- مدني ميراثي تانيماقلا، بيز بشر علملر تاريخيني تدوين ائده بيله‌جه‌ييك. بو يولدا، بيرينجي آدديم، اليازما نسخه‌لريني تانيماق و اونلاري توصيف ائتمك و بلكه اوندان قاباق، مملكتيميز ايرانين كيتابخانالاريندا ساخلانيلان توركجه اليازمالاري امحاء آفتلري و صدمه‌لريندن قوروماق و ساخلاماقدير. بو مقدس ايش ايچون،‌ البته مسؤوللاريميزين خصوصي دقت، و دغدغه‌لري گؤزله‌نيلمكده‌دير.

بوگون، دونيادا بوتون دؤلتلر، اليازمالاري مرمت و حيفظ ائتمگي اؤزلرينه بورج بيليرلر. ايراندادا فارس ديلينده اولان اليازمالار، اينديه قده‌ر حمد اولسون كه ياخشي قورونموشلار و بو اليازمالار ايچون يوزلر توصيفي و تحليلي فهرست يازيلميشدير و مدرن تجهيزات ايله ساخلانيلير. مملكتيميزده موجود اولان مينلر توركجه اليازمالارين قوروماسي‌دا البته دؤلت مسؤوللاري‌نين بوينوندا بير وظيفه‌دير. بو اليازمالارين موضوعلاري چوخ متنوّع و چشيدلي اولموشدور. طب، نجوم، ادبيات و ديني بحثلردن توتموش تا اكينچيليك، كيمياگرليك، علم الحيل، مكانيك و ناغيللارا، توركجه اليازمالارادا قاباق گلمك اولار.

بيزيم بير چوخ مدني آبيده‌ميز ايندي آرادان گئتميشدير و بعضيلريندن يالنيز بير- ايكي اليازما الده دير. ياخشي بيليريك كه دده قورقود آبيده‌سيندن ايندي دونيادا ساخلانيلان يالنيز ايكي اليازما تانينميشدير.

قوتادغو بيليك و عتبة الحقايق منظومه‌لريندن‌ده چوخ آز نسخه معرفي اولموشدور. بير چوخ اوغوزنامه و سلجوق نامه‌لريميزدن قالان اليازمالار ايندي تانينماميش اولموشلار.

دارالارشاد اردبيل شهرينده شيخ صفي مقبره‌سي محلّينده، ساخلانيلان يوزمين اليازمادان، روسلار و سونرا رضا شاهين 1318 ش. غارتيندن سونرا، ايندي بير نسخه‌ده قالماميشدير. شيخ صفي‌نين قارا مجموعه اثري‌نين حصّه‌لريندن ايسه يالنيز بير نسخه تانينميشدير و مناقب شيخ صفي آدي ايله تهراندا فهرست اولونموشدور.

بو اليازمالار بيزيم ديني، مدني،‌تاريخي،‌ ادبي و قومي كيمليگيميز و سيجيلليميزدير. توركجه اليازمالارين بير حصّه‌سي ائولرده ساخلانيلير. بو نفيس اليازمالاردا تانيتديريلمالي و قورونماليدير. كئچميشده آذربايجانليلار، پهلوي حكومتي مزدورلارينا اعتماد ائتمه‌ديكلري ايچون، توركجه اليازمالاري گيزلتميش و يا ايراندان چيخارتميشلار. اودور كي ايندي بير چوخ توركجه شيعه اليازمالاري نجف و كربلا كيتابخانالاريندا ساخلانيلير.

قارا مجموعه‌نين تام متني‌ني تاپيب برپا ائتمه ايچون، گنج نسليميز، شيخ صفي‌يه منسوب اولان بوتون اليازمالاري تاراماليدير. حله‌ليك، بيزيم بورادا نشر ائتديگيميز مجموعه‌لردن علاوه، دونيا كيتابخانالاريندا «سلطان شيخ صفي الدين اردبيلي»يه منسوب اولان توركجه «مناقب»، «مقالات»، «كلمات» آدلي بعضي اليازمالارين توصيفيني آشاغيدا تقديم ائيدريك:

  1. تبريز ملي كيتابخاناسي‌نين حاج حسين آقا نخجواني بؤلومونده ساخلانيلان 710- نمره‌لي توركجه اليازما. بو اليازماني محمد بن حسين الكاتب استنساخ ائتميشدير. او، اليازمانين استنساخيني هيجري 949 – نجو ايلده باشلاميش و 950- نجي ايلده قورتارميشدير. اليازما شيرازدا يازيلميشدير.
  2. تهران، قاباقكي سلطنتي كيتابخانانين مجموعه‌سينه عائد اولان 2761- نمره‌لي توركجه اليازما. بو اليازماني محمود خوشنويس شيرازي هيجري 949- نجو ايلده استنساخ ائتميشدير.
  3. پترزبورگ شهري‌نين شرق شناسليق انستيتوسو كيتابخاناسيندا ساخلانيلان توركجه اليازما.
  4. سالتيكوف شئچدرين عمومي كيتابخاناسيندا ساخلانيلان توركجه اليازما.
  5. تهرانين «ملك» كيتابخاناسيندا ساخلانيلان 3608 نمره‌لي اليازما.
  6. نجفين اميرالمؤمنين كيتابخاناسيندا ساخلانيلان 485 ساييلي اليازما.
  7. تهران دانشگاهيندا ساخلانيلان 4/4209 ساييلي اليازما.

بو نسخه‌لرين هاميسي نشر اولماليدير. و بو مقدس ايش گنج نسليميزين بورجودور.

صفحه قبل صفحه بعد
نظر شما
نام : *
پست الکترونیک :
وب سایت/بلاگ :
*
:) :( ;) :D
;)) :X :? :P
:* =(( :O @};-
:B /:) =D> :S
کد امنیتی : *

برچسب ها : شیخ صفی الدین اردبیلی به روایت دکتر صدیق,شناختنامه شیخ صفی الدین در پژوهشهای دکتر حسین محمدزاده صدیق, شیخ صفی الدین از دیدگاه دکتر محمدزاده صدیق,دکتر محمدزاده صدیق و قارا مجموعه, قارا مجموعه شیخ صفی در تحقیقات دکتر حسین محمدزاده صدیق,تحقیقات دکتر حسین محمدزاده صدیق پیرامون شیخ صفی الدین, تحقیقات دکتر حسین محمدزاده صدیق پیرامون قارا مجموعه شیخ صفی الدین اردبیلی,
ارسال در تاريخ پنجشنبه 6 مهر 1391 توسط دکتر صدیق. ارسال: سید احسان شکرخدایی